tg-me.com/MAYDAYMog/5083
Last Update:
👀На пачатку траўня на волю выйшаў гомельскі блогер Яўген Катляроў — асоба са спрэчнай рэпутацыяй, вядомы сваёй супрацовай з сілавікамі і ўдзелам у палітычных рэпрэсіях. Ён быў асуджаны на паўтара года пазбаўлення волі па палітычных артыкулах і прызнаны праваабаронцамі як палітвязень, ягонае імя 20 снежня 2024 года трапіла ў спіс асоб, датычных да «экстрэмісцкай дзейнасці».
Датэрміновае вызваленне ці памілаванне?
🔻Праваабаронца з Гомеля Леанід Судаленка — сам былы палітвязень, які адбываў тры гады зняволення ў тым ліку на падставе ілжывых паказанняў Катлярова — лічыць, што блогера ўсё ж памілавалі.
“Яго затрымалі 8 красавіка 2024 года, прысуд уступіў у сілу 6 снежня. У СІЗА ён правёў амаль 8 месяцаў, што залічваецца па формуле «дзень за паўтары». Гэта значыць, што ў калоніі ён меў быць усяго паўгода і вызваліцца 7 чэрвеня 2025 года. Але выйшаў на месяц раней — значыць, памілавалі”, — тлумачыць Судаленка.
🤔Афіцыйных паведамленняў з прозвішчамі памілаваных пакуль няма, але праваабаронца ўпэўнены — менавіта гэта і адбылося.
ЗНОЎ У САЦСЕТКАХ - І ЗНОЎ ПРАВАКАЦЫІ
Пасля вызвалення Катляроў хутка аднавіў сваю прысутнасць у сацсетках. У сваіх новых допісах ён паведамляе, што адбываў тэрмін у шклоўскай ПК № 17, згадвае прозвішчы іншых палітвязняў і абвінавачвае іх у «двухмернасці» — маўляў, пісалі прашэнні аб памілаванні, але працягваюць крытыкаваць улады.
“Некаторыя з іх, — піша Катляроў, — расказваюць анекдоты пра “саміведаецекаго” і нават набралі сабе шчокі ў калоніі”.
📝Гэтыя каментары могуць разглядацца як працяг супрацоўніцтва з уладамі або спроба дыскрэдытацыі палітвязняў.
Леанід Судаленка неаднаразова звяртаўся ў Генеральную пракуратуру з патрабаваннем узбудзіць крымінальную справу супраць Катлярова за ілжэсведчанні. Аднак нават пасля таго, як сам Катляроў прызнаўся, што даваў паказанні пад прымусам следчых, Генпракуратура адказала: «складу злачынства няма».
🗣️“Гэта сведчыць толькі пра адно: праваахоўная сістэма абараняе тых, хто для яе зручны”, — адзначае Судаленка.
ШТО ДАЛЕЙ? ЭМІГРАЦЫЯ, НОВЫЯ "ЗАДАННІ" ЦІ ЦІШЫНЯ?
Катляроў застаецца пад наглядам: да канца двухгадовага тэрміну пагашэння судзімасці ён будзе абмежаваны ў правах. Гэта перыяд, калі яго дзейнасць можа быць асабліва цікавым індыкатарам — ці сапраўды ён "адпрацаваны матэрыял", ці яму адведзена далейшая роля ў рэпрэсіўным апараце.
Праваабаронца мяркуе, што ягоная актыўнасць у сацсетках — не выпадковая і можа быць часткай далейшай працы на ўлады.
“А можа, ён яшчэ звернецца ў Байсол па праграму эвакуацыі як “палітвязень” і паедзе ў Еўропу працаваць дальнабойшчыкам. У такім выпадку — Вэлкам, як кажуць, але тут законы працуюць”, — з іроніяй адзначае Судаленка.